|
بيلەپ ءجۇر ءبىر ساۋكەلە،
كوكپەڭبەك كوك جايلاۋ الابىندا.
قونعانداي ءبىر كوبەلەك،
تاپ-تازا تابيعات تاباعىنا.
جۇپ-جۇقا كويلەگى مە،
جاپ-جاسىل نۇر بوياۋىن توكسە قۇزى.
جالتىلداپ كۇن اشىقتا،
سەكىلدى كۇمىس تەكشە كوكشە مۇزى.
بيلەپ ءجۇر ءبىر ساۋكەلە،
سول ما ەكەن ءلالا گۇلى؟
قۇبىلتىپ كورسەتكەندەي،
التىن زەر قاۋاشاعىن-ءسان مونشاعىن.
ەمەس پە وسى مۇرا،
باياعى جىبەك كيگەن،
بايان كيگەن؟
بيلەشى جايلاۋىمنىڭ ءبيشى قىزى،
وكشەسى ارەڭ عانا جەرگە تيگەن.
بيلەپ ءجۇر ءبىر ساۋكەلە،
كوز المان كوك ساۋىرلى كەبىسىنەن.
بەيستىڭ جاسىل سيراق اسەم قۇسى،
وتكەندەي كوڭىلىمنىڭ كەڭىسىنەن.
قاراشى، ساۋكەلەمە، دۋلىعا ما؟
مۇمكىن بۇل ماحابباتىڭ دۋلىعاسى.
قالدىرعان تالاي قىزدى وقتان ساقتاپ،
قابىل بوپ اقىنداردىڭ جىر دۇعاسى.
بيلەپ ءجۇر ءبىر ساۋكەلە،
توگىلىپ اشەكەيى ەتەگىنەن.
سەكىلدى جاسىل-الا ءبىر كوبەلەك،
جەپ-جەڭىل سالماعىمەن كوتەرىلەگەن.
بىلمەيمىن ساۋكەلەمە، التىن ءتاج بە؟
الدە بۇل التىن ءتاجى سۇلۋلىقتىڭ.
الدىندا وسى ءتاجدىڭ
بار بىتكەن پاتشا ءتاجى،
بەكەر-اق ەكەنسىڭ عوي ەندى ۇقتىم.
بيلەي بەر، بيلەي بەرشى،
قىپشا بەل ءبىيشى قىزى قازاعىمنىڭ!
جاتقانداي وسى بىيدە،
مىڭ جىلعى ماحاببات تازا مۇڭى.
ەگەردە پاتشا بولسام،
پاتشالىق بار داڭقىمدى تالاق قىلىپ،
تاستار ەم باسىمداعى التىن ءتاجدى،
اياعىڭنىڭ استىنا لاقتىرىپ.
--------ومارعازى ايتان ۇلى
تەك ساحارا تورابىنا ءتان!
|
|
| كومەك
| باس بەكەتىمىز
| سۇحپات باس بەتىمىز
